TWINS EMPIRE NEWS/LABARAI

Category: Labarai

  • Takaitattun Labaran Safiyar Yau Jumaʼa 31, Oct. 2025

    Labaran Najeriya Na Yau – 31 Ga Oct, 2025

    1. Majalisar Dattawa Ta Tabbatar Da Nadin Dr. Bernard Doro A Matsayin Minista:
    Majalisar Dattawa ta amince da nadin Dr. Bernard Doro a matsayin sabon minista bayan tantancewa da ta ɗauki kasa da minti 30. Shugaban jam’iyyar APC na ƙasa, Farfesa Nentawe Yilwatda, ya halarci zaman majalisar yayin tabbatarwar.

    2. Shugaba Tinubu Ya Yi Wa Hafsoshin Tsaro Sabon Kambun Mukami:
    Shugaba Bola Ahmed Tinubu ya sanya wa sabbin hafsoshin tsaro kambun mukamansu a fadar shugaban ƙasa, Abuja. A ciki akwai Janar Olufemi Oluyede a matsayin shugaban rundunar tsaro (CDS) da Lieutenant Janar Emmanuel Undiendeye a matsayin shugaban leken asiri na soji (CDI).

    3. ‘Yan Kasuwar Man Fetur Sun Yi Gargadin Karin Farashi:
    Manyan ‘yan kasuwar man fetur sun gargadi gwamnati cewa harajin shigo da mai da dizal na kashi 15% da aka amince da shi na iya haddasa sabon karin farashin man fetur a ƙasar. Wannan mataki na kawo rabuwar kai a bangaren masana’antar mai da gas.

    4. Coci Ta Yi Allah Wadai Da Kisan Fasto A Kaduna:
    Cocin United Church of Christ in Nigeria (HEKAN) ta yi Allah wadai da kisan fasto Rev. Yahaya Kambasaya da kuma sace wasu mazauna ƙauyen Farin Dutse a Kauru LGA, Jihar Kaduna. Coci ta ce lamarin ya girgiza al’umma matuƙa.

    5. ’Yan Bindiga Sun Kai Hari A Sokoto:
    Wasu ’yan bindiga sun kai hari ƙauyen Kurawa da ke Sabon Birni, Jihar Sokoto, inda suka kashe mutane uku ciki har da mai rikon sarautar ƙauyen. Sun kuma yi garkuwa da wasu mazauna garin tare da sace shanu fiye da 40.

    6. Shugaba Tinubu Ya Umurci Hafsoshin Tsaro Su Kara Kaimi:
    Shugaban ƙasa Bola Tinubu ya umurci sabbin hafsoshin tsaro da su ƙara ƙaimi wajen murƙushe ta’addanci da fashi da makami. Ya ce “’Yan Najeriya suna jiran sakamako, ba hujja ba.”

    7. Rundunar Sojoji Ta Yi Sabbin Canje-canje A Mukamai:
    Babban hafsan sojoji Lieutenant Janar Waidi Shaibu ya amince da sabon tsarin sauya mukaman manyan hafsoshi a sassan rundunar. Ya ce wannan matakin zai ƙarfafa jagoranci da inganta aikin tsaro.

    8. Mataimakin Gwamnan Bayelsa Ya Maka Kotu Don Dakatar Da Tsigewa:
    Mataimakin gwamnan Jihar Bayelsa, Sanata Lawrence Ewhrudjakpo, ya shigar da ƙara a babbar kotun tarayya, Abuja, yana neman dakatar da yunkurin tsige shi daga ofis saboda kin ficewa daga jam’iyyar PDP zuwa APC.

    9. INEC Ta Ce Kungiyoyi 8 Sun Kammala Rajistar Jam’iyya:
    Hukumar zaɓe ta ƙasa (INEC) ta tabbatar da cewa kungiyoyi takwas sun kammala matakin farko na neman rajistar jam’iyya, yayin da shida aka ƙi amincewa da su. Sanarwar ta fito daga kwamishinan bayanai, Sam Olumekun.

    10. Gwamna Adeleke Ya Ce Babu Wanda Zai Iya Doke Shi A 2026:
    Gwamnan Jihar Osun, Ademola Adeleke, ya ce ba ya jin tsoron kowa a zaben gwamna na shekara ta 2026, yana mai cewa “ko Shugaba Tinubu ba zai yi wani abu da zai bata min gwamnati ba.”

  • Takaitattun Labaran Safiyar Yau Laraba 29, Oct. 2025

    Labaran Najeriya Na Yau – 29 Ga Oct, 2025

    1. Gwamnatin Amurka ta soke takardar izinin shiga ƙasar (visa) ta B1/B2 da aka bai wa fitaccen marubuci kuma mai lambar yabo ta Nobel, Farfesa Wole Soyinka. Soyinka ya bayyana hakan yayin taron manema labarai mai taken “Unending Saga: Idi Amin in Whiteface!” a Freedom Park, Lagos, ranar Talata.

    2. Majalisar Dattawa za ta fara tantance sabbin manyan hafsoshin tsaro da Shugaba Bola Ahmed Tinubu ya mika sunayensu gobe Laraba. Tinubu ya aika da wasikar neman tabbatar da su zuwa majalisar.

    3. Hukumar Zaɓe ta Ƙasa (INEC) ta gargadi jami’an tsaro da aka tura don zaɓen gwamna na jihar Anambra mai zuwa ranar 8 ga Nuwamba da kada su ba da damar siyan ƙuri’u, tana cewa hakan na lalata amincewar jama’a ga tsarin dimokuraɗiyya. Shugaban INEC, Farfesa Joash Ojo Amupitan (SAN), ne ya bayyana haka a Abuja ranar Talata.

    4. Tsohon gwamnan jihar Jigawa, Alhaji Sule Lamido, ya fara matakin shari’a don kalubalantar cire sunansa daga jerin masu neman kujerar shugaban jam’iyyar PDP. Majiyoyi sun tabbatar cewa Lamido ya gana da lauyoyinsa kuma ya riga ya sanya hannu kan rantsuwar da za a mika kotu ranar Laraba.

    5. Shugaban kwamitin tsaron cikin gida na Majalisar Wakilai, Garba Muhammad, ya bayyana cewa ‘yan majalisa sun samu barazanar bama-bamai daga ‘yan ta’adda, lamarin da ya sa ake neman ƙarfafa tsaro a ginin majalisar.

    6. Naira ta ƙara samun ƙima a kasuwar bayan fage inda ta koma N1,487 a kan kowace dala, daga N1,491 a ranar Litinin. Haka nan ta ƙaru zuwa N1,447 a kasuwar musayar kuɗi ta ƙasa (NFEM).

    7. Babbar kotun tarayya da ke Abuja ta yi watsi da ƙarar da tsohon mataimakin kwamishinan ‘yan sanda, Abba Kyari, da ‘yan uwansa suka shigar don neman a soke shari’ar da hukumar NDLEA ta ke yi musu. Ana tuhumar su da laifuka 23 da suka shafi rashin bayyana kadarori.

    8. Wata mata mai shekaru 35 mai suna Habiba Abubakar da ‘yarta mai shekaru 9, Adama, sun rasu a hatsarin jirgin ruwa a karamar hukumar Hawul, jihar Borno. Lamarin ya faru ranar Asabar, 26 ga Oktoba, misalin karfe 1:15 na rana yayin da suke dawowa daga gona.

    9. Rundunar ‘yan sanda ta jihar Anambra ta kama mata huɗu bisa zargin safarar jaririya mai mako guda a Ifite-Awkuzu. Kakakin rundunar, SP Tochukwu Ikenga, ya tabbatar da kama su a sanarwar da ya fitar ranar Talata a Awka.

    10. Majalisar Dattawa ta tabbatar da nadin mutane shida a matsayin kwamishinoni na hukumar Revenue Mobilisation, Allocation and Fiscal Commission (RMAFC), bayan ta karɓi rahoton kwamitin shirye-shirye da harkokin tattalin arziki.

  • Takaitattun Labaran Safiyar Yau Talata 28, Oct. 2025

    Labaran Najeriya Na Yau – 28 Ga Oct, 2025

    1. Shugaba Tinubu Ya Sadu Da Sabbin Hafsoshin Tsaro:

    Shugaban kasa Bola Ahmed Tinubu ya gana da sabbin hafsoshin tsaro a fadar gwamnati, Abuja, a ranar Litinin. Wannan ganawa ce ta farko tun bayan nada su kwanaki uku da suka gabata, kuma an gudanar da ita a bayan ƙofa.

    2. Nnamdi Kanu Ya Fasa Kiran Shaidu A Kotu:

    Shugaban haramtacciyar kungiyar IPOB, Nnamdi Kanu, ya sanar wa kotu cewa ya janye shirin kiran shaidu domin kare kansa, yana mai cewa babu wani hujja da ke tabbatar da laifin da ake tuhumar sa da shi.

    3. APC Ta Gargadi Jama’a Su Riƙe Gwamnoni Da Shugabannin Kananan Hukumomi Accountable:

    Shugaban jam’iyyar APC na kasa, Farfesa Nentawe Yilwatda, ya ce yanzu gwamnoni da shugabannin kananan hukumomi suna karɓar kuɗin da ya ninka sau uku zuwa hudu fiye da da, don haka ya kamata ‘yan Najeriya su tambaye su yadda ake kashe kudin.

    4. Kabiru Tanimu Turaki Ya Mika Takardun Neman Kujerar Shugaban PDP:

    Tsohon Ministan Harkokin Musamman, Kabiru Tanimu Turaki, SAN, ya mika takardun neman kujerar shugaban jam’iyyar PDP. Za a gudanar da babban taron zaben shugabanni na jam’iyyar a ranar 15–16 ga Nuwamba, 2025 a Ibadan, Jihar Oyo.

    5. Gwamna Oyebanji Ya Lashe Tikitin APC Na Zabe Na Biyu:

    Gwamnan Jihar Ekiti, Abiodun Oyebanji, ya samu tikitin jam’iyyar APC domin neman wa’adin mulki na biyu ta hanyar matsayar hadin kai (consensus) a zaben fidda gwani da aka gudanar a Ado-Ekiti ranar Litinin.

    6. Shugaban INEC Ya Yi Alkawarin Gyara Tsarin Shari’o’in Zabe:

    Sabon shugaban hukumar INEC, Farfesa Joash Amupitan, ya ce zai kawo karshen yawan shari’o’in da ake yi kafin zabe. Ya bayyana haka ne a taron shekara-shekara na ƙungiyar malamai masu koyar da dokoki a jami’ar Abuja.

    7. Ma’aikatar Shari’a Ta Kare Shari’ar Da Ta Kai Kan Sanata Natasha:

    Ofishin Babban Lauyan Kasa ya bayyana cewa karar da aka kai kan Sanata Natasha Akpoti-Uduaghan saboda batanci da kalaman da ta yi kan shugaban majalisa Godswill Akpabio da tsohon gwamnan Kogi Yahaya Bello na bisa doka.

    8. Kotu Ta Yanke Hukuncin Kisa Ga ’Yan Fashi Uku A Ekiti:

    Babbar kotu a Ado-Ekiti ta yanke hukuncin kisa ta rataya ga mutum uku bisa laifin fashi da makami da suka aikata a gidan wata tsohuwa mai shekara 87, inda suka kwace mata N186,000 da agogo.

    9. ‘Yan Bindiga Sun Yi Wa Mai Ajiye Kuɗi Kwanton Bauna A Ibadan:

    ‘Yan bindiga sun farmaki wani mutum da ya fito daga banki a yankin Osuntokun, Ibadan, inda suka jikkata ɗan sanda kuma suka kwace masa kuɗin da bai bayyana adadinsa ba.

    10. Paul Biya Ya Lashe Zaben Shugaban Kasar Kamaru:

    Kotun kundin tsarin mulki ta Kamaru ta bayyana Paul Biya, mai shekaru 92, a matsayin wanda ya lashe zaben shugaban kasa. Biya, wanda yake mulki tun 1982, ya samu kashi 53.66 cikin dari na kuri’un da aka kada.

  • Takaitattun Labaran Safiyar Yau Jumaʼa 24, Oct. 2025

    Labaran Najeriya Na Yau – 24 Ga Oct, 2025

    1. Sabon Shugaban INEC Ya Kama Aiki:

    Sabon shugaban hukumar zabe ta kasa (INEC), Farfesa Joash Amupitan, ya kama aiki a yau Alhamis bayan rantsuwar da Shugaba Bola Tinubu ya yi masa a fadar shugaban kasa. Ya ce ba za a taɓa yin wasa da sahihancin tsarin zaben Najeriya ba.

    2. PDP Za Ta Fara Tantance ’Yan Takararta:

    Jam’iyyar PDP ta sanar da cewa za ta fara tantance ’yan takara da ke neman mukamai daban-daban a babban taron jam’iyyar da ke tafe a ranar Talata, 28 ga Oktoba, a Legacy House, Abuja. Gwamnan Adamawa, Ahmadu Fintiri, ne ya bayyana haka.

    3. Gwamnati Ta Kori Jami’an Shige Da Fice 8:

    Gwamnatin tarayya ta kori jami’an Hukumar Shige da Fice 8, ta yi wa wasu 5 ritaya dole, sannan ta rage mukaman wasu 8 saboda aikata laifuka daban-daban. Haka kuma, an sallami karamin jami’ai biyu saboda laifukan satar makamai, garkuwa da mutane, da sata.

    4. Dakarun Sojoji Sun Kashe ’Yan Ta’adda 50:

    Sojojin “Operation Hadin Kai” sun ce sun kashe ’yan ta’adda sama da 50 a hare-haren da suka kai a Borno da Yobe, inda suka hana su kai farmaki a sansanonin sojoji. Hakan ya faru tsakanin ƙarfe 12:00 na dare zuwa 4:00 na safe ranar Alhamis.

    5. Gobara Ta Tashi A Kasuwar Shuwaki, Kano:

    Fiye da rumfuna 500 sun kone a gobarar da ta tashi a kasuwar Shuwaki da ke karamar hukumar Gari, Jihar Kano. Hukumar kashe gobara ta ce gobarar ta tashi ne da misalin ƙarfe 3:25 na rana ranar Laraba.

    6. EFCC Ta Ce Ta Wanke Sama Da Naira Biliyan 566:

    Shugaban hukumar EFCC, Ola Olukoyede, ya bayyana cewa hukumar ta kwato kudaden da suka kai N566 biliyan, inda ya ce hakan ya taimaka wajen aiwatar da manufofin tattalin arzikin Shugaba Tinubu.

    7. Majalisa Ta Duba Dokar ’Yantar Da EFCC:

    Majalisar wakilai ta amince da karatun kudiri na biyu da ke neman gyara dokar kafa EFCC domin samar mata da cikakken ’yancin aiki. Dan majalisa daga Jihar Filato, Yusuf Gagdi, ne ya dauki nauyin kudirin.

    8. An Samu Gawar Wata Budurwa A Adamawa:

    An gano gawar wata baiwar Allah mai shekaru da ba a tantance ba a bayan katangar jami’a da ke karamar hukumar Mubi, Jihar Adamawa. Rahotanni sun ce an samu raunukan wuka a jikinta.

    9. Jana’izar Hadarin Tankar Mai A Jihar Neja:

    Gwamnatin Jihar Neja ta gudanar da jana’izar hadin gwiwa ga mutanen da suka mutu a fashewar tankar mai da ta yi sanadin mutuwar mutum 39 da jikkatar wasu 60 a yankin Essan. Gwamnatin ta ce ta raba kayan magani na naira miliyan 10 ga asibitocin da ke kula da raunanan.

    10. ’Yan Kungiya Sun Harbe Mai Sayar Da Shawarma:

    An harbe wani mai sayar da shawarma a yankin Mowo, kan titin Badagry, Jihar Legas, da ake zargin ’yan kungiyar asiri ne suka aikata laifin. Rahotanni sun ce lamarin ya faru da yammacin Laraba.

  • Takaitattun Labaran Safiyar Yau Alhamis 23, Oct. 2025

    Labaran Najeriya Na Yau – 23 Ga Oct, 2025

    1. Shari’ar Nnamdi Kanu:

    Shugaban haramtacciyar kungiyar IPOB, Nnamdi Kanu, ya kammala tattaunawar sirri da tawagar lauyoyinsa karkashin jagorancin tsohon Babban Lauyan Tarayya, Kanu Agabi. Ana sa ran fara kare kansa a kotu ranar Alhamis, 23 ga Oktoba.

    2. Zaben Shugaban Jam’iyyar PDP:

    Shugabannin PDP daga Arewa, ciki har da gwamnoni, sun amince da tsohon Ministan Harkokin Musamman, Tanimu Turaki, a matsayin dan takarar hadin kai don kujerar shugaban jam’iyyar a babban taron da za a gudanar a watan Nuwamba.

    3. Akpabio Ya Yaba Da Zabukan Najeriya:

    Shugaban Majalisar Dattawa, Godswill Akpabio, ya ce tsarin zabe a Najeriya ya inganta sosai tun bayan ficewar PDP daga mulki. Ya bayyana haka ne yayin tattauna da majalisa kan kudirin gyaran dokar zabe a jiya Laraba.

    4. ASUU Ta Dakatar Da Yajin Aikinta:

    Kungiyar Malaman Jami’o’i ta ASUU ta dakatar da yajin aikin makonni biyu da ta fara. Shugaban ASUU na kasa, Farfesa Chris Piwuna, ne ya sanar da hakan a taron manema labarai a Abuja.

    5. Gwamnan Jihar Neja Ya Yi Gargaɗi Ga ‘Yan Fashi:

    Gwamna Mohammed Bago ya ce ba zai taba tattaunawa da ‘yan fashi ko biyan kudin fansa ba, ya kuma bukaci jama’a su kare kansu daga hare-haren da ake kai musu. Ya bayyana haka ne yayin ziyarar ta’aziyya ga mutanen Rijau da Magama.

    6. Barazanar ISWAP:

    Gwamnatocin jihohin Ondo da Kogi sun ce babu dalilin fargaba bayan gargadin DSS kan yiwuwar harin ISWAP a wasu yankunan jihohin. Sun ce jami’an tsaro suna cikin shiri don kare rayuka da dukiyoyi.

    7. Farashin Naira:

    Naira ta karu zuwa ₦1,492 kan kowanne dala a kasuwar bayan fage, daga ₦1,495 a jiya Talata. Sai dai ta fadi zuwa ₦1,462 a kasuwar musayar kudade ta NFEM.

    8. Kananan Gwamnatocin Kano:

    Mutane 500 daga jam’iyyar NNPP a Fagge da Ungogo sun koma jam’iyyar APC. Daraktan Hadejia-Jam’are River Basin, Rabiu Bichi, ne ya karɓe su jiya Laraba.

    9. Jam’iyyar ADC Ta Kori Wasu Jiga-jiganta:

    Rukunin ADC na jihar Kaduna ya kori mataimakin shugaban jam’iyyar na jiha, Ahmed Tijani Mustapha, da wasu mutum takwas saboda zargin aikata manyan laifuka.

    10. Davido Ya Zama Shugaban Hukumar Wasanni:

    Gwamnatin Osun ta nada shahararren mawaki David Adeleke (Davido) a matsayin shugaban Osun Sports Trust Fund, don taimakawa wajen samo kudade da inganta harkokin wasanni a jihar.

  • Takaitattun Labaran Safiyar Yau Laraba 22, Oct. 2025

    Labaran Najeriya Na Yau – 22 Ga Oct, 2025

    1. An ƙona sakatariyar jam’iyyar ADC a Ado-Ekiti

    Wasu da ake zargin ’yan daba ne suka ƙona sakatariyar jam’iyyar ADC da ke yankin Basiri, Ado-Ekiti a daren Litinin. Wuta ta lalata kujeru, kayan ofis, lasifika da sauran kayan aiki.

    2. Kotu ta soke zaɓen kananan hukumomi a Ebonyi

    Babbar kotun tarayya da ke Abakaliki ta soke zaɓen kananan hukumomi da aka gudanar a watan Yuli 2024 a Jihar Ebonyi. Mai shari’a Hillary Oshomah ya ce zaɓen bai bi tanadin dokar zaɓe ba.

    3. Gobarar mota mai ɗauke da fetur ta kashe mutane a Neja

    Mutane da dama sun mutu a mummunar fashewar tankar mai da ta faru a hanyar Agaie–Bida, kusa da Essa, a ƙaramar hukumar Katcha, Jihar Neja. Gobarar ta haddasa cunkoson ababen hawa sosai.

    4. Tinubu ya nada sabon Minista daga Jihar Plateau

    Shugaba Bola Ahmed Tinubu ya nada Dr Bernard Mohammed Doro daga Jihar Plateau a matsayin Minista. Nadinsan na jiran amincewar majalisar dattawa kafin ya fara aiki.

    5. Gwamna Bala Mohammed ya kafa sabbin masarautu 13 a Bauchi

    Gwamnan Bauchi, Bala Mohammed, ya rattaba hannu kan dokar da ta ƙirƙiri sabbin masarautu 13 da sarakuna 111 a faɗin jihar. Haka kuma ya soke dokar Sayawa Chiefdom tare da kafa Zaar Chiefdom da hedkwata a Mhrim Namchi.

    6. Lauyan Nnamdi Kanu da ’yan uwansa sun shiga gidan yari

    Wata kotun majistare a Kuje ta bayar da umarnin tsare lauya Aloy Ejimakor, ɗan’uwan Nnamdi Kanu, da wasu mutum 10 da aka kama a zanga-zangar #FreeNnamdiKanu.

    7. Kotun Koli ta dakatar da yanke hukunci kan karar PDP da Tinubu

    Kotun koli ta ɗage yanke hukunci a kan karar da jihohin da jam’iyyar PDP ke mulki suka shigar don kalubalantar ayin dokar ta baci da Shugaba Tinubu ya ayyana a Jihar Rivers.

    8. Gwamnati ta umarci MDAs su mika asusun su na bankuna

    Ofishin Akanta Janar na Tarayya ya umarci dukkan Ma’aikatu, Hukumomi da Sassa (MDAs) su mika bayanan asusun su da ke bankunan kasuwanci, domin inganta tsarin kula da kuɗi.

    9. Dan majalisa Ojema Ojotu ya sauya sheka daga PDP zuwa APC

    Dan majalisar wakilai mai wakiltar Apa/Agatu, Ojema Ojotu, ya fice daga jam’iyyar PDP zuwa APC. Mataimakin Kakakin Majalisa, Benjamin Kalu, ne ya karanta wasikar sauya shekar a zaman majalisar.

    10. INEC ta ce masu kada kuri’a miliyan 2.8 za su shiga zaɓen Anambra

    Hukumar zaɓe ta ƙasa, INEC, ta ce kimanin miliyan 2.8 na masu kada kuri’a ne za su shiga zaɓen gwamnan Anambra da za a gudanar a 8 ga Nuwamba, 2025.

  • Shell da Sunlink sun amince da aikin iskar gas na dala biliyan 2 a Najeriya

    Shell da Sunlink sun amince da aikin iskar gas na dala biliyan 2 a Najeriya

    Kamfanin mai na duniya, Shell, tare da Sunlink Energies, sun amince da sabon aikin haɓaka iskar gas a wajen teku na Najeriya, wanda zai samar da iskar gas ga Nigeria LNG.

    Gwamnatin Najeriya ta tabbatar da cewa jarin aikin ya kai kimanin dala biliyan 2, wanda ke nuna tsare-tsaren Shell na faɗaɗa kasuwancin iskar gas (LNG) a duniya da kuma ƙarfafa matsayinta a Najeriya, duk da ƙalubale da ta fuskanta a cikin shekaru da suka gabata.

    A baya-bayan nan, Shell ta sayar da hannunta a filayen mai na cikin ƙasa (onshore) saboda matsalolin zubewar mai da satar man fetur, amma wannan sabon jarin ya tabbatar da cewa kamfanin na da niyyar ci gaba da zuba jari a Najeriya.

    A halin yanzu, Kamfanin Man Fetur na Kasa (NNPC) yana da kashi 49% na mallakar Nigeria LNG, yayin da Shell ke da kashi 25.6%, ita ce mai riƙe da kaso na biyu mafi girma.

    Sauran masu hannun jari a kamfanin LNG sun haɗa da TotalEnergies da Eni (Agip).

    An gano filin HI a shekarar 1985, wanda ke kusan kilomita 50 daga bakin teku da zurfin mitoci 100 a cikin teku.

    An shirya fara samar da iskar gas daga wannan fili kafin ƙarshen wannan shekaru goma (kafin 2030).

    A cewar Olu Verheijen, mai ba wa shugaban ƙasa shawara kan harkokin makamashi, samar da iskar gas daga wannan fili zai cika kusan kashi ɗaya bisa uku (⅓) na gas ɗin da ake buƙata don aikin Train 7 na Nigeria LNG.

    A karkashin yarjejeniyar, Shell Nigeria Exploration and Production Company (SNEPCo) za ta mallaki kashi 40% na aikin, yayin da Sunlink Energies za ta riƙe kashi 60%.

    Wannan mataki na Shell ya yi daidai da manufar kamfanin na ƙara yawan samar da iskar gas a duniya da kashi 4 zuwa 5 cikin ɗari a kowace shekara har zuwa 2030.

    A watan da ya gabata, Hukumar Gudanar da Albarkatun Man Fetur ta Najeriya (NUPRC) ta amince da cinikayyar dala miliyan 510 da kamfanin TotalEnergies ya yi, inda ya sayar da kashi 12.5% na hannunsa a Oil Mining Lease (OML) 118, wanda ke ɗauke da filin mai na Bonga, ga Shell da Eni (Agip).

    Wannan ci gaban yana nuna sabon babi a tsarin kasuwancin iskar gas a Najeriya, tare da fatan ƙara samar da kudaden shiga, ayyukan yi da kuma tallafawa ci gaban tattalin arzikin ƙasa.