Wata tankar man fetur (PMS) ta kife a Gadar Tincan Liverpool da ke Apapa, Jihar Lagos, lamarin da ya janyo mutane suka rika debar man da ya zube daga karkashin gadar.
Tashar Channels Television ta wallafa bidiyon faruwar lamarin a safiyar ranar Litinin, inda aka ga wasu ‘yan Najeriya na kwasar man fetur daga tankar da ta kife, duk da hadarin da ke tattare da hakan.
A cewar rahoton Channels TV:
“Abin da ke faruwa a yanzu a Gadar Tincan Liverpool, Apapa: Tankar mai ta kife, mutane kuma suna dibar man da ya zube daga karkashin gadar.”
Jaridar DAILY POST ta bayyana cewa fashewar tankokin mai na ci gaba da zama babbar masifa a Najeriya, duk da gargadin da hukumomi ke ta yi akai-akai game da hadarin tattara man da ya zube, wanda kan haddasa asarar rayuka da dukiyoyi.