Takaitattun Labaran Safiyar Yau Jumaʼa 12, Sep. 2025
Ahmad Habib IbrahimLabaran Najeriya Na Yau – 12 Ga Satumba, 2025
📰 1. FG ta soke harajin kashi 5% kan kiran waya da intanet
Gwamnatin tarayya ta soke harajin kashi 5% da aka saka kan ayyukan kiran waya da intanet. Hukumar Wayar Da Kai ta Ƙasa (NOA) ce ta sanar da sokewar harajin a wata sanarwa da ta fitar ranar Alhamis.
📰 2. IGP Egbetokun ya ce ’yan ta’adda sun fi jami’an tsaro wayewa
Sufeton ’Yan Sanda na Ƙasa, Kayode Egbetokun, ya amince cewa masu laifi da ke addabar ’yan Najeriya a sassa daban-daban na ƙasar sun sha gaban jami’an tsaro ta hanyoyi da dama. Ya ce ’yan ta’addar ba “’yan daba marasa tsari” ba ne, domin suna da makamai masu ƙarfi, suna samun tallafi sosai, kuma suna da haɗin kai da ƙasashen waje har suna amfani da sabbin fasahohi.
📰 3. Jonathan da Peter Obi sun gana a Abuja
Tsohon Shugaban Ƙasa, Goodluck Jonathan, da dan takarar shugaban ƙasa na jam’iyyar Labour Party (LP) a zaɓen da ya gabata, Peter Obi, sun yi ganawa a Abuja ranar Alhamis. Ganawar ta zo ne a daidai lokacin da ake ta rade-radin cewa jam’iyyun adawa na tunanin tsayar da ɗayansu domin kalubalantar Shugaba Bola Tinubu a zaɓen 2027.
📰 4. Kotun tarayya ta yanke wa jagoran Ansaru hukuncin shekaru 15
Wata babbar kotun tarayya da ke Abuja a ranar Alhamis ta yanke wa ɗaya daga cikin shugabannin Ansaru da DSS ta kama kwanan nan, Mahmud Muhammed Usman (wanda aka fi sani da Abu Bara’a), hukuncin shekaru 15 a gidan yari kan laifin hakar ma’adinai ba bisa ka’ida ba. Bara’a ɗan asalin karamar hukumar Okene ne a Jihar Kogi.
📰 5. EFCC ta kama Mele Kyari, ta ba shi beli
Tsohon Shugaban Kamfanin Mai na Ƙasa (NNPCL), Mele Kyari, ya samu beli a ranar Alhamis bayan fuskantar tambayoyi daga hukumar EFCC kan zargin aikata almundahana. An yi masa tambayoyi kan zarge-zargen da suka shafi hada baki, amfani da mukami ba bisa ka’ida ba, da kuma halasta kuɗin haram.
📰 6. Kamfanin Dangote zai fara rarraba mai kai tsaye daga ranar 15 ga Satumba
Kamfanin mai na Dangote ya bayyana cewa zai fara rarraba mai kyauta kai tsaye a fadin ƙasar daga Litinin, 15 ga Satumba. Haka kuma, ya rage farashin mai a Lagos da yankin Kudu maso Yamma zuwa N841 kowace lita. A Abuja, Edo, Kwara, Rivers da Delta kuwa zai kasance N851 kowace lita.
📰 7. ’Yan sanda sun kama mace da ta jefar da jaririyarta a Nasarawa
Rundunar ’yan sanda a jihar Nasarawa ta kama wata mata da ake zargin ta jefar da jaririyarta a daji da ke karamar hukumar Akwanga. Kakakin rundunar, SP Ramhan Nansel, ya tabbatar da kamun ranar Alhamis a Lafia, inda ya bayyana cewa wacce ake zargin ɗaliba ce a shekarar ƙarshe a Kwalejin Ilimi ta Akwanga.
📰 8. INEC: Ƙungiyoyi 14 kacal daga cikin 171 sun cika sharuddan zama jam’iyyar siyasa
Hukumar Zaɓe ta Ƙasa (INEC) ta bayyana cewa ƙungiyoyi 14 ne kacal daga cikin ƙungiyoyi 171 da suka nemi rajista a matsayin jam’iyyun siyasa suka cika sharuddan ci gaba zuwa mataki na gaba. Kwamishinan INEC na ƙasa, Sam Olumekun, wanda kuma shi ne shugaban kwamitin bayani da ilimin masu kada ƙuri’a, ya bayyana haka a wata sanarwa bayan taron hukumar ranar Alhamis a Abuja.
📰 9. FG: Babu wani rahoton hukumance kan korar ’yan Najeriya daga Amurka zuwa Ghana
Gwamnatin tarayya ta bayyana a ranar Alhamis cewa ba ta samu wani rahoto hukumance kan batun korar ’yan Najeriya daga Amurka zuwa Ghana ba. Wannan jawabi ya biyo bayan rahotannin da suka ce Ghana ta karɓi ’yan Najeriya da sauran ’yan Afirka ta Yamma da aka kora daga Amurka bisa wani sabon tsarin.
📰 10. APC ta dage bikin rantsar da kwamitin yakin neman zaben Anambra
Jam’iyyar APC ta dage bikin rantsar da kwamitin ta na yakin neman zaben gwamnan jihar Anambra da ke tafe. Mai magana da yawun jam’iyyar na ƙasa, Felix Morka, ne ya bayyana hakan a wata sanarwa, inda ya ce za a sanar da sabon lokaci daga baya.