‘Yan ta’adda Sanye da Rigar Sojoji Sun Sace Mutane 30 A Katsina

Wasu ‘yan ta’adda sanye da kayan sojoji a daren Lahadi sun yi garkuwa da mutane 30 a kauyen Tasharnagulle da ke karamar hukumar Batsari ta jihar Katsina. Wakilinmu ya tattaro cewa ‘yan ta’addan sun kai hari kauyen ne da misalin karfe 8 na daren Lahadi.

Majiyoyi daga cikin al’ummar sun bayyana cewa ‘yan bindigar sun shiga kauyen ne suka fara harbin iska.

Ya kara da cewa daga nan ne wasu daga cikin ‘yan fashin suka fara bi gida-gida suna addabar mutane suna ce musu su fito kada su gudu, hakan ya sa suka samu damar hada mutane da dama domin yin garkuwa da su.

Wani mutum da ya tsallake rijiya da baya, ya bayyana cewa, da suka je wani wuri inda ‘yan bindigar suka ajiye babura, sai suka yi kidayar kai, adadinsu ya kai 31 maza da mata (ciki har da ‘yan mata da matan aure), sannan suka ce kowa ya hau. babura.

Ya ce daga nan ne ya samu ya tsere ya koma gida.

Yayin da mazauna yankin suka tabbatar wa manema labarai faruwar lamarin, hukumomin ‘yan sanda sun ce suna ci gaba da gudanar da bincike kan lamarin.

Kakakin ‘yan sandan Abubakar Sadiq Aliyu ASP, ya ce za su binciki lamarin.