Tsohon jami’in hulda da jama’a na ‘yan sanda ya mutu kwanaki kadan bayan bikin ranar haihuwa

Tsohon kakakin rundunar ‘yan sandan jihar Ribas, SP Nnamdi Omoni ya rasu.

SP Omoni ya rasu ne a ranar Talata a Fatakwal, babban birnin jihar Ribas kuma har yanzu ba a san musabbabin mutuwarsa ba.

Ya yi bikin zagayowar ranar haihuwarsa a ranar Juma’ar da ta gabata a Fatakwal.

Kafin rasuwarsa, Omoni ya kasance jami’in ‘yan sanda na ofishin ‘yan sanda na Elimgbu a karamar hukumar Obio Akpor.

Ya rike mukamin ne bayan da aka kara masa girma zuwa mukamin Sufeto na ‘yan sanda.

Sai dai rundunar ‘yan sandan jihar Ribas ba ta fitar da wata sanarwa ba kan sabon lamarin.