Tsohon Gwamnan Jihar Kaduna, Nasir El-Rufai, ya yi gargadin cewa Najeriya za ta iya samun shugaba mai mulki har abada irin na Paul Biya na Kamaru idan ‘yan Najeriya ba su hada kai suka tsayar da Shugaba Bola Ahmed Tinubu ba.
El-Rufai ya ce duk ikirarin Tinubu na gwagwarmayar dimokuraɗiyya da kishin tsarin tarayya karya ne, domin gwamnatinsa tana ƙoƙarin maida duka iko a hannun tarayya. Ya yi kira ga ‘yan Najeriya su tashi su kare dimokuraɗiyya kafin zaɓen 2027, inda ya ce idan ba a yi haka ba, Tinubu zai iya neman zama shugaba har abada.
Martanin Fadar Shugaban Ƙasa da APC
- Kakakin Shugaban Ƙasa, Bayo Onanuga, ya karyata wannan magana, ya ce Tinubu dan dimokuraɗiyya ne mai mutunta iyakar wa’adin mulki guda biyu da kundin tsarin mulki ya tanada.
- Ya soki El-Rufai da cewa yana cikin rudani da baƙin ciki saboda irin goyon bayan da Tinubu ke samu a Arewacin Najeriya.
- Jam’iyyar APC ta kira kalaman El-Rufai “shirme da karya”, ta kuma tunatar da rawar da Tinubu ya taka wajen kawo ƙarshen mulkin soja da tsayuwar daka ga dimokuraɗiyya.
Masu goyon bayan El-Rufai
Wasu masana da ‘yan Najeriya sun ce El-Rufai ya fadi gaskiya, suna zargin cewa:
- Majalisar Dattawa da Ta Wakilai sun zama tamkar na’urar amincewa da duk abin da shugaban kasa ya kawo.
- Kotunan Najeriya sun yi shiru kan wasu shari’o’i da suka shafi mulkin Tinubu.
- Matsin tattalin arziki da rashin tsaro sun yi tsanani amma mutane sun kasa yin bore, suna nuna cewa an rike su da tsoro.
- Jam’iyyun adawa kuma suna ruguje, abin da zai iya bawa Tinubu damar kara karfi kafin 2027.
Masu sukar El-Rufai
Wani bangare kuma ya ce El-Rufai ya yi mubaya’a, domin:
- Tinubu ya goyi bayan ’yan sandan jihohi da kuma ’yancin kananan hukumomi – abin da ke nuna bai mayar da iko a tarayya kadai ba.
- Suna zargin El-Rufai da son zuciya, saboda shi ma a Kaduna ya taba amfani da iko yadda yake so.