Dole ‘yan Najeriya su mutunta jami’an ‘yan sanda – IGP

Sufeto Janar na ‘yan sandan Najeriya, IGP Usman Alkali Baba, ya yi Allah-wadai da kakkausar murya kan harin da aka kai wa jami’an ‘yan sandan Najeriya.

Baba wanda ya bayyana hakan a cikin wata sanarwa da CSP Olumuyiwa Adejobi ya sanya wa hannu a ranar Litinin, ya yi gargadin cewa za a fuskanci mummunan sakamako, yana mai cewa dole ne ‘yan Najeriya su mutunta jami’an ‘yan sanda da ke gudanar da ayyukansu na hukuma da doka a wurare daban-daban a fadin kasar.

IGP din ya jaddada cewa hare-haren da ake kaiwa Jami’an ‘Yan Sanda, wadanda ke sanye da rigar kakin jihar, duk ya sabawa doka, kuma cin zarafi ne da bin doka da oda.

IGP ya yi gargadin cewa, ba za a sake lamuntar kai wa jami’an ‘yan sanda da mutanen da ke bakin aikinsu hari ba, ta kowace hanya, domin rundunar ta rike rayukan ma’aikatanta. Don haka, IGP ya umurci dukkan hukumomin ‘yan sanda da su tabbatar da cewa mutanen da ke kai farmaki kan jami’an ‘yan sanda, ba tare da la’akari da abubuwan da suka gabata ba, sun fuskanci fushin doka ta hanyar gaggawar gurfanar da su a gaban kotunan da suka cancanta.

Sufeto-Janar na ‘yan sandan a yayin da yake nanata kudirin rundunar na tabbatar da tsaron rayuka da dukiyoyi, ya jaddada muhimmancin bin muhimman hakkokin jami’an ‘yan sanda da sauran jami’an tsaro, domin ba su damar ci gaba da aikinsu na alfarma. da kuma kare ‘yan kasa da kyau da kiyaye doka da oda.