Bala’in kwale-kwale: Taraba ta Samo gawarwaki 20

Kwamishinan ayyuka na musamman da ci gaban jama’a na jihar Taraba, Savior Noku, ya ce akalla gawarwaki 20 ne aka gano a hatsarin kwale-kwalen da ya afku a kan hanyar ruwan Mayo-Renewo-Karim Lamido da ke kogin Benue a ranar 28 ga watan Oktoba.

Noku ya bayyana hakan ne a ranar Asabar din da ta gabata yayin ziyarar jajantawa ga iyalan wadanda abin ya shafa a al’ummar Binneri da ke karamar hukumar Karim Lamido a jihar.

Mataimakin gwamnan jihar Alhaji Aminu Alkali yayin da yake jajantawa iyalan wadanda lamarin ya rutsa da su da sauran al’ummar yankin, ya bayyana alhininsa kan faruwar lamarin tare da bayyana cewa gwamnati ta haramta tafiye-tafiyen dare a magudanar ruwa a fadin jihar domin dakile sake aukuwar lamarin.

Yayin da yake dora alhakin lamarin kan shingayen magudanar ruwa da matsunta ke kokarin kama kifi, mataimakin gwamnan ya bayar da umarnin a kawar da duk wani shingen da ke kan magudanar ruwa cikin kwanaki bakwai.

Wannan ci gaban bakin ciki ba abu ne da za a yarda da shi ba. Wannan lamarin da aka shaida mana ya samo asali ne sakamakon shingen shingen da matsunta suka yi a magudanar ruwa.

“Don haka gwamnati ta haramta duk wani tafiye-tafiye na dare a magudanan ruwa, kuma dole ne a share duk wani shingen da ke kan magudanar ruwa cikin kwanaki bakwai.

“Bugu da kari, duk fasinjojin dole ne su sanya rigar rayuwa kafin su shiga kwale-kwale a jihar. Kuma daga yanzu, dole ne a dauki bayanan fasinjojin da ke cikin kwale-kwale kafin su tashi,” inji shi.

Rohotonni na cewa, wani jirgin ruwa dauke da fasinjoji 104 yawancinsu mata da kananan yara ya kife a kogin Benue a ranar 28 ga watan Oktoba yayin da yake dawowa daga kasuwar kifi ta Mayo-Renewo da ke karamar hukumar Ardo-Kola zuwa Bineri a karamar hukumar Karim Lamido a jihar.