An Sace ‘Yar Shekara 5 A Kwara

Wasu ‘yan bindiga sun yi garkuwa da mutane uku a wani samame daban-daban guda biyu a karamar hukumar Asa ta jihar Kwara. An tattaro cewa lamarin ya faru ne a kusa da…

Wasu ‘yan bindiga sun yi garkuwa da mutane uku a wani samame daban-daban guda biyu a karamar hukumar Asa ta jihar Kwara.

An tattaro cewa lamarin ya faru ne a kusa da hanyar Aboto da Ajelanwa tsakanin karfe 2:00 na rana zuwa karfe 6:00 na yammacin ranar Lahadi.

Jaridar Aminiya ta rawaito cewa lamarin na farko ya faru ne a lokacin da wani mai suna Abdulfatai, dillalin Aluminum ke dawowa daga gona tare da ‘ya’yansa uku a cikin mota kuma aka yi musu tarnaki.

Wata majiya a unguwar ta ce, “Abdulfatai ya tsere ya bar yaran uku a cikin motar. Masu garkuwa da mutanen sun sako ‘yan uwan biyu ne bayan sun ce za su iya samun hanyar komawa gida inda suka yi awon gaba da Abdulbasit mai kimanin shekaru biyar.

“Hakika na biyu ya faru ne da misalin karfe 6 na yamma lokacin da wani Saheed da aka fi sani da Bakayoko ke kai Ramat wacce ‘yar koyon sana’a ce a shagon sayar da magunguna da kuma abokiyar aikinta (matasa ‘yan kimanin shekara 18) a kan babur aka kama su.

“Amma Bakayoko ya yi riya cewa yana so ya samo takalmansa da suka fado ya tsere ya bar ‘yan matan da ke cikin rigar koyon aikinsu,” in ji shi.

Aminiya ta tattaro cewa masu garkuwa da mutanen sun tuntubi Abdultafai, inda suka bukaci a biya shi N10m domin su sako yaronsa.

Jami’in hulda da jama’a na rundunar ‘yan sandan jihar Kwara, Ajayi Okasanmi, ya tabbatar wa da wakilinmu faruwar lamarin, inda ya ce an kama daya daga cikin wadanda ake zargin.

“Eh, gaskiya ne kuma mun kama daya daga cikin masu garkuwa da mutane. Amma har yanzu ana ci gaba da gudanar da bincike,” inji shi.