Buhari Ya Taya Kristoci Murnar Bikin Kirsimeti

Shugaban kasar Najeriya Muhammadu Buhari ya taya Kristoci murnar bikin Kirsimeti da tare da fatan shiga sabuwar shekara lafiya. 

A wani sakon gaisuwar Kirsimeti da ya aikawa ‘yan Najeriya, shugaba Muhammadu Buhari, ya sha alwashin yin aiki tukuru don ci gaban talakan kasar. 

“Ina tabbatar wa ‘yan uwana cewa wannan gwamnati ta tsaya tsayin daka wajen ganin an daukaka darajar rayuwar talakawan Najeriya.” 

Haka kuma ya yi kira ga ‘yan dukkan ‘yan Najeriya da suje ayi musu allurar rigakafin Coronavirus, ganin yadda a wannan lokacin rigakafin ke kare mutane tare da hana yaduwar cutar. 

Cikin sakon, ya tabo batutuwa masu yawa ciki har da na tsaro, inda ya tabbarwa ‘yan Najeriya irin nasarorin da jami’an tsaron kasar suke samu, duk kuwa da wasu kalubale da har yanzu ake fama da su. 

Shugaban ya kuma ce ya tattauna batun kara kaimi ga yakin da matsalar tsaro a yankin Yammacin Afirka da takwarorinsa na kungiyar ECOWAS.