Lai Mohammed ya yi watsi da rahoton binciken rikicin EndSars

Ministan yada labarai da al’adu na Najeriya Alhaji Lai Mohammed, ya yi watsi da rahoton kwamitin bincike da gwamnatin jihar Legas ta kafa kan zargin harbe-harbe da aka yi a kofar shiga unguwar Lekki. 

A wani taron manema labarai da ya kira a Abuja a ranar Talata, Ministan ya kira rahoton a matsayin “jaddada labaran ƙarya da ake yaɗa wa a kafofin sadarwa na intanet tun lokacin da al’amarin ya faru a watan Oktoba, kamar yadda ya shaida

“Mun yi watsi da batun cewa sojojinmu da ƴan sanda sun halaka ƴan Najeriya da ba su ba su gani ba a Lekki a ranar 20 ga watan Oktoban 2020,” in ji Lai Mohammed.

Ministan ya ƙara da cewa zargin kisa ba ƙaramin abu ne wanda ba zai dogara kaɗai ba akan zargi yana mai cewa an fitar da rahoton ne da ke yawo a kafofin sadarwa don a kunyata gwamnati da kuma hukumominta ba tare da hujjoji ba.

Ya ce gwamnati ba za ta taɓa bari hukumominta na tsaro su ci zarafi ko keta haƙƙin ƴan Najeriya ta ko wace irin hanya, “dalilin da ya sa aka soke SARS tare da ƙarfafawa jihohi su kafa kwamitin bincike kan rahotannin take haƙƙin ɗan Adam da ake zargin ƴan sandan SARS sun yi.