Rundunar sojin Najeriya ta ce ta ceto mutane 16 da wasu ‘yan bindiga suka yi garkuwa da su a kauyen Tantatu da ke Kajuru a jihar Kaduna.
Janar Onyeama Nwachukwu, Daraktan Hulda da Jama’a na Sojojin ya bayyana cewa, a martanin da sojojin suka samu, sun bi sawun ‘yan ta’addan, inda suka yi ta harbe-harbe, sannan suka yi nasarar kubutar da mutanen kauyen da aka sace.
Ku tuna cewa an sace mutane 87 da suka hada da yara kanana da jarirai a lokacin da ‘yan ta’adda dauke da makamai suka mamaye unguwarsu a daren Lahadi.
A cikin kwanaki 8 da suka gabata, wasu da ake zargin ‘yan ta’adda ne sun kai hare-hare a kalla sau uku a kan al’ummomi a karamar hukumar Kajuru, inda suka yi garkuwa da mutane sama da 160.
A halin yanzu, sama da mutane 140 har yanzu suna cikin zaman talala a wuraren da ba a san inda suke ba.
Babban Hafsan Tsaro, Christopher Musa, yayin da ya ziyarci Kaduna a ranar Litinin, ya ba da tabbacin aniyar rundunar na ceto duk wadanda aka sace.