Rundunar sojin Najeriya ta ce ta cimma wasu nasarori a yaƙin da take yi da masu tayar da ƙayar baya da ƴn bindiga da kuma masu satar mutane a sassan ƙasar daban-daban a cikin mako biyu da suka gabata.
Hedikwatar tsaron ƙasar ce taa sanar da hakan a ranar Alhamis a yayin taronta na mako bibbiyu da take yi, inda a wannan karon ta bayyana nasarorin da ta ce ta samu daga ranar 29 ga watan Yuli zuwa 12 ga Agustan 2021.
Wannan sanarwa na zuwa ne a daidai lokacin da wasu sassan ƙasar ke ci gaba da fuskantar hare-haren ƴan bidniga da masu satar mutane don karɓar kudin fansa, sannan da ci gaba da kasancewar ɗaliban wasu makarantu a tsare a hannun ƴan bindigar.
Ga dai jerin wasu nasarorin da rundunar ta ce ta cimma kamar yadda daraktan yaɗa labarai na hedikwatar tsaro Birgediya Janar Benard Onyeuko ya bayyana.
Kashe ƴan bindiga
Rundunar ta ce dakaru sun kashe masu tayar da ƙayar baya da ƴan fashi 156.
27 daga cikin wadanda aka kashe ɗin Rundunar Operation Hadin Kai ce ta kashe su a Arewa maso Gabashin ƙasar.
A yankin arewa maso yammacin ƙasar kuwa rundunar sojin sama ta Operation Hadarin Daji ta kashe ƴan fashi 123 tare da lalata maɓoyarsu.
An kama ƴan bindiga 64
Dakaru sun kama ƴan bindiga 64 kamar yadda daraktan yaɗa labarai na rundunar ya ce.
Daga cikin waɗanda aka kama akwai fitaccen mai satar shanu Mallam Buda Umar daga Jamhuriyyar Nijar da Mai Hatsi Ibrahim daga jihar Sokoto da wasu ƴan fashi huɗu da kuma masu safarar ƙwayoyi.
Sannan a arewa maso gabashin ƙasar dakarun Rundunar Haɗin Kai sun kama mayaƙan Boko Haram 54.
A jihohin Binuwai da Taraba ma an kama ƴan bindiga takwas.
An ƙwace makamai
Dakarun tsaron sun ce sun ƙwato makamai da dama a samame da yawa da suka kai.
“An ƙwace manyan makamai 35 da harsasai 1,051 da bindigogin AK-47 da bindigogi samfurin rifle da masu harbo jiragen yaƙi da ƙananan bindgiggogi da manyan samfurin mashin gan da sauran su a arewa maso gabas,” in ji Birgediya Janar Onyeuko.
A arewa maso yamma ma dakarun sun ce sun ƙwato makamai da harsasai da dabbobi.
Birgediya ya ce, “A jumulla an ƙwato dabbobi 89 da AK-47 biyar da jigida uku da sauran su.”
A Taraba da Binuwai ma an ƙwato bindigogin samfurin AK-47 shida da ƙananan bindigogi biyu da harsasai.
Mayaƙan Boko haram 1,000 sun miƙa wuya
Hedikwatar tsaron ta ce fiye da mayaƙan Boko Haram da na ISWAP 1,000 da iyalansu ne suka miƙa wuya, ciki har da mata da yara a wurare daban-daban a yankin arewa maso gabas.
Fitattu daga cikinsu akwai ƙwarraren mai haɗa bam na ƙungiyar Boko Haram Musa Adamu wanda aka fi sani da Mala Musa Abuja da mataimakinsa Usman Adamu da aka fi sani da Abu Darda.
Daraktan yaɗa labaran ya ce “hakan ba ƙaramar nasara ba ce a yaƙi da Boko Haram.”
An ceto mutane
A arewa maso gabas an ceto fararen hula 29 a wannan ɗan tsakanin in ji ta bakin daraktan yada labaran hedikwatar tsaron.
Yayin da a arewa maso yamma rundunar sojin sama ta Operation Hadarin Daji ta ceto mutum huɗu daga hannun ƴan bindigar.
Brig Gen Onyeuko ya ce sun samu kira daga mazauna wasu garuruwa kan batun masu satar shanu da ƴan fashi da masu satar mutane a jihohin Sokoto da Zamfara, inda dakaru suka fatattaki masu laifin, suka ceto manoma da wasu mutane da aka sace.
Kazalika a jihohin Binuwai da Taraba an ceto wasu mutanen.
An kai samame
Hedikwatar tsaron ta ce tsakanin ranar 2 zuwa 6 ga watan Agusta dakarun rundunar Operation HADARIN DAJI ta kai hare-haren sama kan maɓoyar ƴan fashi da garin Dansadau da Dajin Kuyambana da Dajin Sububu da wasu yankuna a ƙaramar hukumar Marun Jihar Zamfara.
Birgediya ya ce an samu nasarar lalata sansanonin ƴan fashin da dama da suka haɗa da gidan wani shugabansu Halilu Tubali, inda a lokacin ƴan fashin suka taru suna wata ganawa.
Sannan hedikwatar tsaron ta ce an wargaza sansanonin mayaƙan Boko Haram da na ISWAP a samamen da aka kai.
A Kudancin ƙasar
Hedikwatar tsaron ta ce rundunar Operation DELTA SAFE ta kai samame kan wuraren da ake ayyuakn da ba bisa ƙa’ida ba a kudu maso kudancin ƙasar, inda aka gano wuraren da ake tace man fetur na bisa ƙai’da ba
Sannan an samo makamai da suka haɗa da bindigogin AK-47 da rifle da Smoke gun rifle da harsasai da sauran makamai da kuma jiragin ruwa mai tsananin gudu.
Kazalika an kashe masu fafutukar IPOB shida da kuma kama 13.