Barcelona ta raba maki da Celta Vigo, bayan da ta tashi 2-2 a gidan Celta Vigo a gasar La Liga da suka fafata ranar Asabar.
Luiz Suarez ne ya fara ci wa Barca kwallo bayan da Lionel Messi ya yi bugun tazara, amma sai Fedor Smolov ya farke bayan da Okay Yokuslu ya ba shi kwallo.
Suarez ne dai ya ci Barca na biyu ta yi kyau sosai – kuma Messi ne ya ba shi kwallon – sai dai kuma Aspas ya farke a bugun tazara.
Celta ta kusan kara kwallo na uku daf da za a tashi wasa bayan da Nolito ya samu dama ya buga kwallo, amma sai ta je gurin Marc-Andre ter Stegen kai tsaye.
Messi, wanda har yanzu bai ci kwallo a wasa uku na Barcelona ba yana da 699 da ya zura a raga a wasan da ya yi wa Barca da tawagar Argentina.
Sai dai kwallo na biyu da Suarez ya ci, Messi ya bayar da kwallo an zura a raga sau 250 a barca kenan.
Messi, mai shekara 33 shi ne kan gaba a cin kwallaye da 21 a La Ligar bana, ya kuma bayar da 17 aka zura a raga nan ma shi ne na daya a bana.
Barcelona tana mataki na daya da tazarar maki daya tsakaninta da Real Madrid wacce za ta buga wasa ranar Lahadi da Espanyol.