An rufe makaranta a Jihar Delta bayan ɗalibin da malami ya yi wa bulala ya mutu

Gwamnatin Jihar Delta ta rufe wata makarantar firamare a garin Asaba saboda rasuwar wani ɗalibi mai suna Obina Udeze ɗan wata 19 da haihuwa.

Gidan talabijin na Channels TV ya gano cewa yaron ya mutu ne sakamakon raunin da wani malami mai suna Emeka Nwogbo ya ji masa, wanda rahotanni suka ce ya yi masa bulala a ranar Litinin da ta gabata.

An ce yaron ya yi rashin lafiya bayan dukan da aka yi masa kuma an kai shi babban asibitin tarayya da ke Asaba. Yanayin lafiyarsa ya tabarbare har sai da ya zama ajalinsa a safiyar Asabar.

Kwamishinan ilimi na Delta Chika Ossai ya shaida Channels TV cewa makarantar ba ta samu amincewar gwamnatin jihar ba. Ya ƙara da cewa gwamnati ta yanke shawarar rufe makarantar ce saboda mai makarantar ba shi da lasisin aiki.

A halin yanzu, malamin da ake zargi yana hannun ‘yan sanda yayin da ake ci gaba da bincike. Kakakin rundunar ‘yan sandan Delta, DSP Bright Edafe, ya ce sun fara bincike kan mutuwar Udeze.