A karon farko likitocin Amirka, sun samu nasarar yin dashen zuciyar alade ga wani mutum.
Cikin watan Satumbar bara ne dai, likitocin suka fara gwajin dashen a jikin gawa
Rahotanni sun nunar da cewa dashen da aka samu nasarar yi wa mutumin mai suna David Bennett da ke da shekaru 57 a duniya, zai taimaka gaya sakamakon karancin sassan jikin dan Adam da ake bukatar yin dashensu ga marasa lafiya. A yanzu haka dai Bennett na samun sauki, kuma a cewarsa yana fata ci gaba da gudanar da harkokinsa na rayuwar yau da kullum nan ba da jimawa ba. Bennett dai ya kwashe tsawon watanni a gadon asibiti, yana jinya ba tare da an samu zuciyar da za a dasa masan ba. Hukumar Kula da Ingancin Abinci da Magunguna ta Amirkan ce dai, ta ba ta izinin gaggauta yi wa Bennett dashen zuciyar aladen, a jajiberin sabuwar shekarar nan ta 2022 da muke ciki.